१३ औं सागमा प्याराग्लाइडिङ नहुने निश्चित

0 49

दक्षिण यसियाली खेलकुद (साग) को १३ औं संस्करणमा प्याराग्लाइडिङ प्रतियोगिता नहुने निश्चित भएको छ । प्रतियोगिताका लागि बुधबारसम्म अन्तिम समय तोकिएको थियो । तर, अन्तिम समयसम्म नेपाल र पाकिस्तानबाहेक तेस्रो राष्ट्र सहभागी नहुने भएपछि प्रतियोगिता नहुने भएको हो ।

नेपाल प्याराग्लाइडिङ एसोसिएसनका महासचिव शैलेन्द्र रावतले अन्तिम समयसम्म तेस्रो राष्ट्रले खेलाडी दर्ता नगरेपछि प्रतियोगिता नहुने भएको जानकारी दिए । ‘पाकिस्तानबाट पनि जम्मा २ जना खेलाडीकोमात्रै नाम दर्ता भएको छ । तर, प्रतियोगितामा भाग लिन ५ पुरुष र ३ महिला अनिवार्य हुनुपर्छ,’ उनले भने, ‘दर्ता भएको राष्ट्रले पनि खेलाडी संख्या नपु¥याएकाले खेल नहुने भएको हो ।’ सागको नियम अनुसार प्रतियोगिता हुन कम्तीमा ३ राष्ट्र सहभागी हुनुपर्छ ।

प्रतियोगिता सराङकोटको तोरीपानीमा सञ्चालन गर्ने तय थियो । तर, सहभागी राष्ट्र अपुग भएकाले प्रतियोगिता स्थगित हुने भएको हो । ‘आज (बुधबार)सम्म खेलाडी दर्ताका लागि समय तोकिएको थियोे । अहिलेसम्म सहभागी राष्ट्रको संख्या नपुगेपछि प्रतियोगिता नहुने निश्चित भयो,’ रावतले भने, ‘तर, ओलम्पिक कमिटीले अहिलेसम्म प्रतियोगिता नहुनेबारे हामीलाई कुनै जानकारी भने दिएको छैन ।’

Leave A Reply

Your email address will not be published.